Times Square (1980)

(1980年英國Promote Poster)


(81年Movie雜誌Vol.81內頁)

原本舊blog一早想寫好耐,但始終認為自己文筆太渣,唔夠料去寫呢套super cult-classic,但重複睇左2-3次,越睇就越有感覺,因為套戲入面Nicky呢個角色,實在係一個rocker既生活寫照:拾荒,流浪,低下層工作----總之就係爛撻撻既生活,而呢種生活文化亦係吾輩搖滾,重金屬既精神核心所在,所以對於我呢個以前都體會過既過來人,尤其是係阿paul呢一個同我有相同經歷,都係23-4,5歲左近週街盪既"前輩"級rock友黎講,會更加身同感受.

故事內容,大致上係講一個鐘意rock music但玩結他都幾屎下既少年犯Nicky(Robin Johnson飾),係一次搞事之後被人送左去精神病院,機緣巧合之下遇到議員個女Pamela(Trini Alvarado飾)---一個其實冇咩問題,只不過係因為細個果陣父母離異,加上內向性格,所以被老豆誤以為佢精神有事...後黎Pamela係病院入面一直有寫匿名信去一間名為WRJD既電台表達自己既心聲,從而認識到電台入面既DJ Johnny(Tim Curry飾);及後Pamela跟Nicky係病院相識,初時Pamela對Nicky果D癲癲得得既性格冇咩好感,但經歷一齊"逃院",一齊生活過,捱過之後,漸漸地,佢開始打開左自己既心窗,開始嘗試活出自己既人生,之後更加同Nicky組成隊band Sleaze Sister係Johnny既電台玩live;不過,Nicky之後為左要提高自己既知名度,不斷係街頭週圍大樓"掟"電視,Pamela勸阻無效,之後搞到不歡而散..Nicky大受打擊,係失去好拍檔兼好友之後,Nicky先知道原來Pamela係佢心中不知不覺間已經成為佢既精神支柱,而2人大家最後都知大家缺一不可,最後終於再走埋一齊,成功係紐約既Times Square出show,完成Nicky既心願(之不過Nicky都仲未唱完一首歌,警察就已經上門捉人,Nicky即刻跳入人群中閃人...);Nicky同Pamela,佢地都永遠互相記住對方.

成套戲最深刻印象既,一定係Robin Johnson呢個後生女(當時)入形入格既演技,真係完全演活到一個係80年代成長既一群----一班係越戰後出生,但又經歷過70年代文化運動,滯漲帶黎既經濟不景,佢地都感到無助,徬徨,好似DJ Johnny係電台讀出Pamela寄俾電台既匿名信中透露心聲一樣:"我感到冰冷,既沒有朋友,又不懂運動,我好像被社會拋棄了."而音樂,係佢地唯一一個途徑,可以將不安,憂慮甚至係憤怒都完全拋開既容身之所---你可以話係發洩,你可以話係逃避,whatever...而片中Nicky既角色,就係阿paul, Ricky佢地果一輩既縮影;雖然係香港黎講,打爛車頭燈,掟電視落街係過份左D,而我亦都唔係提倡D人去做一個有破壞,冇建設,但D人,其實知唔知呢D行為,係有一種作為對社會反抗既意識係度?而呢個,亦係搖滾同重金屬既精神所在.
而另外一點,就係Nicky果一種流浪既rocker生活:街頭流浪,打工只係為左應付生活,熱衷於音樂,不受拘束...好多以搖滾,重金屬為題材既movie,大部份都係以呢種生活作為藍本,但時代唔同,而家好多既rock movie唔係個character家景富裕到可以俾條蛋散可以係度扮rock溝女,就係成日脫離現實,下下有奇蹟出現,根本就冇說服力可言;而且,呢一種蒼桑,飽經風霜既look及feeling,已經俾人濫用.(係直頭搞亂攤檔,整到個分界線非常模糊:例如個rock友係真係好tough,但外人就會覺得佢扮野).我覺得,可以拍出果種raw感,同埋真係"prototype"最基本,最原始既rocker feel,都係呢套Times Square.

所以,阿Paul睇完,都要我搵返隻俾佢----因為呢D生活,就係佢後生時既寫照.

p.s.寫完,都係覺得文筆不佳,始終我都係一個講野叻過寫野既人.haha